پی ٹی آئی راہ نما شبلی فراز کو عدالت نے بیرون ملک جانے کی اجازت دے دی
اسلام آباد: اسلام آباد ہائی کورٹ نے پی ٹی آئی کے رہنما شبلی فراز کا نام ایگزٹ کنٹرول لسٹ (ای سی ایل) سے نکالنے کا حکم دے دیا۔
اسلام آباد ہائی کورٹ کے جسٹس طارق محمود جہانگیری نے شبلی فراز کی بیرون ملک جانے پر پابندی سے متعلق درخواست پر سماعت کی۔ شبلی فراز اپنے وکیل کے ساتھ عدالت میں پیش ہوئے۔
درخواست گزار کے وکیل نے دوران سماعت بتایا کہ شبلی فراز پر 4 ایف آئی آرز درج ہیں اور وہ تمام مقدمات میں ضمانت پر ہیں۔
جسٹس طارق محمود جہانگیری نے سرکاری وکیل سے پوچھا کہ کیا اس وقت کوئی نیا جواز موجود ہے؟ سرکاری وکیل نے جواب دیا کہ عدالت جو حکم دے گی، اس پر عمل کیا جائے گا۔
جسٹس طارق محمود جہانگیری نے مزید کہا کہ وزارت داخلہ اور ڈی جی پاسپورٹس عدالت کو مطمئن نہیں کر سکے۔ انہوں نے ہدایت کی کہ ایک ہفتے کے اندر شبلی فراز کا نام ایگزٹ کنٹرول لسٹ سے نکال کر عدالت میں رپورٹ جمع کروائی جائے۔
عدالت نے ڈی جی پاسپورٹ اور ڈی جی ایف آئی اے کو عملدرآمد رپورٹ پیش کرنے کا حکم دیا۔
