لائیڈ آسٹن: حملے کی صورت میں امریکا اسرائیل کا دفاع کرے گا
منیلا: امریکی وزیر دفاع لائیڈ آسٹن نے خبردار کیا ہے کہ اگر اسرائیل پر حملہ ہوا تو امریکا اپنے اتحادی کے دفاع میں میدان میں آئے گا۔
عالمی خبر رساں ادارے کے مطابق، لائیڈ آسٹن نے فلپائن میں صحافیوں سے بات کرتے ہوئے یہ بیان دیا جب ان سے ایران میں اسرائیل کے مبینہ حملے میں حماس کے سربراہ اسماعیل ہنیہ کی شہادت کے بارے میں پوچھا گیا۔
لائیڈ آسٹن نے اسماعیل ہنیہ کی موت پر براہ راست تبصرہ کرنے سے گریز کرتے ہوئے کہا کہ ان کے پاس اس معاملے پر مزید معلومات نہیں ہیں۔
ایک سوال کے جواب میں کہ امریکا مشرق وسطیٰ میں بڑھتی ہوئی کشیدگی میں اسرائیل کی کیسے حمایت کر سکتا ہے، امریکی وزیر دفاع نے کہا کہ وہ نہیں سمجھتے کہ جنگ ناگزیر ہے اور سفارت کاری کے مواقع ہمیشہ موجود ہوتے ہیں۔
تاہم، انہوں نے یہ بھی واضح کیا کہ اگر اسرائیل پر حملہ ہوا تو امریکا اپنے اتحادی کے دفاع کے لیے فوراً کارروائی کرے گا۔
یہ بات قابل ذکر ہے کہ امریکا نے ابھی تک ایران میں اسرائیل کے مبینہ حملے میں حماس کے سربراہ اسماعیل ہنیہ کی موت پر کوئی رسمی ردعمل ظاہر نہیں کیا ہے۔
