ایلون مسک کی دولت میں ایک دن میں بڑی کمی
نیویارک: دنیا کے امیر ترین شخصیات میں شامل ایلون مسک کی دولت میں گزشتہ دن کے دوران 21 ارب 70 کروڑ ڈالرز کی بڑی کمی واقع ہوئی ہے مگر وہ اب بھی دنیا کے امیر ترین فرد کے طور پر اپنا مقام برقرار رکھے ہوئے ہیں۔
بلومبرگ کے مطابق، ایلون مسک کی دولت میں یہ کمی اس وقت آئی جب ان کی کمپنی ٹیسلا کے حصص کی قیمتوں میں 11 فیصد کی بڑی گراوٹ دیکھی گئی۔ ایلون مسک ٹیسلا کے 21 فیصد حصص کے مالک ہیں، جس کے سبب ان کی دولت میں اتنی بڑی کمی واقع ہوئی۔
اس کمی کے باوجود، ایلون مسک کی موجودہ دولت اب بھی 241 ارب ڈالرز کے قریب ہے، جو انہیں دنیا کے امیر ترین شخص کے طور پر برقرار رکھتی ہے۔ ان کے بعد دوسرے نمبر پر جیف بیزوس ہیں، جن کی دولت میں بھی 5 ارب ڈالرز کی کمی آئی ہے۔ بیزوس کی مجموعی دولت اب 204 ارب ڈالرز ہے۔
فرانس کے برنارڈ آرنلٹ 187 ارب ڈالرز کے ساتھ تیسرے نمبر پر ہیں، جبکہ فیس بک کے مالک مارک زکربرگ 165 ارب ڈالرز کے ساتھ چوتھے نمبر پر ہیں۔ مائیکروسافٹ کے بانی بل گیٹس کی دولت 157 ارب ڈالرز ہے، جو انہیں پانچواں امیر ترین شخص بنا رہی ہے۔
