حکومت کا بانی پی ٹی آئی کے پیغام پر شدید ردعمل: رانا ثنا اللہ کی وارننگ
اسلام آباد: آرمی چیف کے نام بانی پی ٹی آئی کے پیغام پر حکومت نے سخت ردعمل ظاہر کیا ہے۔ وزیراعظم کے سیاسی مشیر رانا ثنا اللہ نے کہا کہ بانی پی ٹی آئی کا فوج، آرمی چیف اور ریاست کے خلاف پروپیگنڈا کسی سے ڈھکا چھپا نہیں ہے۔ ان کا کہنا تھا کہ اس طرح کے بیانات سے یہ سب چیزیں بھلائی نہیں جا سکتیں۔
رانا ثنا اللہ نے مزید کہا کہ پی ٹی آئی والے اپنی نجی محفلوں میں کہتے ہیں کہ ہماری بات ہوگئی ہے، نومبر میں چیف جسٹس کے بدلتے ہی الیکشن کی تیاری کریں۔ انہوں نے کہا کہ پی ٹی آئی کی قیادت کی گفتگو پر شک ہوتا ہے اور ہمیں الرٹ رہنا ہوگا اور ان چیزوں کو مینیج کرنا ہوگا۔
رانا ثنا اللہ نے خبردار کیا کہ یہ کچھ کرنے جا رہے ہیں یا کوشش کریں گے۔ انہوں نے کہا کہ ہمیں نظر آرہا ہے کہ یہ جال بُن رہے ہیں تاکہ کوئی راستہ نکل سکے۔
حکومت نے بانی پی ٹی آئی کے بیانات کو سختی سے مسترد کرتے ہوئے عوام کو یقین دلایا ہے کہ ملک کے آئینی اداروں اور افواج کے خلاف کسی بھی قسم کا پروپیگنڈا برداشت نہیں کیا جائے گا۔
