سری لنکا نے مسلمانوں کی میتیں جلانے پر معذرت کر لی
کولمبو: سری لنکا کی حکومت نے کورونا وبا کے دوران مسلمانوں کی میتوں کو جلانے پر معافی مانگ لی ہے۔
حکومت کی جانب سے جاری بیان میں کہا گیا ہے کہ کورونا کے دوران آخری رسومات کی لازمی پالیسی پر کابینہ نے معافی نامہ جاری کیا ہے۔ نیا قانون اب آخری رسومات یا تدفین کے حق کو یقینی بنائے گا تاکہ آئندہ مسلمانوں یا کسی بھی دوسری کمیونٹی کی آخری رسومات کی خلاف ورزی نہ ہو۔
کورونا کی عالمی وبا کے دوران، سری لنکا کے صدر گوتابایا راجا پاکسے نے کورونا سے جاں بحق مسلمانوں کی تدفین پر پابندی عائد کردی تھی، جس کی وجہ سے مسلمانوں کی میتوں کو شدید احتجاج کے باوجود جلا دیا گیا تھا۔ سری لنکن حکومت نے عالمی ادارہ صحت کی یقین دہانی کو بھی نظر انداز کیا تھا کہ اسلامی رسومات کے مطابق تدفین کا عمل بالکل محفوظ ہے۔
اقوام متحدہ کی انسانی حقوق کونسل اور دیگر فورمز نے بھی مسلمانوں کی میتیں جلانے پر سری لنکن حکومت کی مذمت کی تھی۔ سری لنکا کی آبادی میں مسلمان تقریباً 10 فیصد ہیں، جو کہ تقریباً 2 ملین ہیں۔
