لاہور: تاج پورہ میں 315 ملی میٹر بارش، 30 سالہ ریکارڈ ٹوٹ گیا
لاہور:لاہور میں حالیہ بارشوں نے ایک نیا ریکارڈ قائم کیا ہے، جہاں تاج پورہ کے علاقے میں 315 ملی میٹر بارش ریکارڈ کی گئی۔ یہ بارش 30 سالوں میں ہونے والی سب سے زیادہ بارش ہے، جس کی وجہ سے شہر کی سڑکیں اور گلیاں دریا کا منظر پیش کر رہی ہیں۔
تیز ہواؤں کے ساتھ موسلادھار بارش کے نتیجے میں انتظامیہ پانی کی نکاسی کا آپریشن جاری رکھے ہوئے ہے۔ گزشتہ سال سب سے زیادہ بارش لکشمی چوک میں 291 ملی میٹر ریکارڈ ہوئی تھی۔
مقامی انتظامیہ نے بتایا کہ ڈیوس روڈ، چائنا چوک، کینال روڈ، گڑھی شاہو، اور دیگر اہم مقامات پر بارش کا پانی جمع ہو چکا ہے، جس کے باعث مشکلات کا سامنا ہے۔ بارش کا سلسلہ مختلف علاقوں میں جاری ہے، جس نے شہری زندگی کو متاثر کیا ہے۔
واسا کے مطابق مختلف علاقوں میں بارش کے اعداد و شمار درج ذیل ہیں:
لکشمی چوک: 130 ملی میٹر
مغل پورہ: 132 ملی میٹر
گلشن راوی: 133 ملی میٹر
چوک ناخدا: 122 ملی میٹر
اقبال ٹاؤن: 128 ملی میٹر
قرطبہ چوک: 125 ملی میٹر
سمن آباد: 135 ملی میٹر
ائرپورٹ: 71 ملی میٹر
گلبرگ: 41 ملی میٹر
