ٹاؤن ہال ملازمین نے ٹریفک وارڈن کو تشدد کا نشانہ بنا ڈالا، لاہور پولیس نے ٹریفک وارڈن کو تشدد کا نشانہ بنانے والوں کے خلاف مقدمہ درج کر لیا ہے۔ ایف آئی آر کے مطابق لاہور میں ٹاؤن ہال کے قریب ٹریفک وارڈن نے نامعلوم موٹرسائیکل سوار کو بیرئیر ہٹانے سے منع کیا تھا، منع کرنے کہ بعد موٹر سائیکل سوار طیش میں آگیا اور اس نے بیرئیر کو ٹھڈے مارنا شروع کردیے۔
پاکستانی نجی ٹی وی چینل کے مطابق موٹر سائیکل سوار نے فون کر کے اپنے 15 سے 20 ساتھیوں کو بلا لیا اور وہ سب مل کر وارڈن کو اغوا کر کے ٹاؤن ہال لے گئے۔ ٹاؤن ہال لے جانے کے بعد ٹریفک وارڈن کو تشدد کا نشانہ بنایا گیا۔پولیس کے مطابق ملزمان نے ٹریفک وارڈن سلیم کو حبس بےجا میں رکھا اور پھر نیم بہوشی کی حالت میں چھوڑ کر فرار ہوگئے۔
سی ٹی او لاہور نے واقعہ کا نوٹس لے لیا ہے اور ملزمان کے خلاف فوری کارروائی کا حکم دے دیا ہے۔ تفصیلات کے مطابق پولیس نے ملزمان کے خلاف اغواء، سرکاری معاملات میں مداخلت اور سنگین نتائج کی دھمکیوں سمیت دیگر دفعات کے تحت مقدمہ درج کر لیا ہے۔
