سموگ سے ستائے شہریوں کی سنی گئی، بادل برسنے کو تیار۔ لاہور کا موسم ابر آلود ہو گیا، محکمہ موسمیات نے بارش کی پیشگوئی کر دی۔ اس حوالے سے صوبائی وزیر ہاؤسنگ سید اظفر علی ناصر اور کمشنر لاہور محمد علی رندھاوا کے حکم پر ایم ڈی واسا غفران احمد نے واسا لاہور کو پیشگی الرٹ رہنے کی ہدایات کردی۔ ایم ڈی واسا غفران احمد نے کہا ہے کہ تمام سٹاف و مشینری مکمل الرٹ رہیں، تمام ڈسپوزل اسٹیشنز کی سکرینوں کو مکمل صاف کرنے کی ہدایات کردی گئی ہے جبکہ انہوں نے مزید ہدایت کی ہے کہ تمام جنریٹرز کو اسٹینڈ بائی اور فعال رکھا جائے ۔
دوسری جانب محکمہ موسمیات کے مطابق پنجاب اور خیبر پختونخوا کے بعض میدانی علاقوں میں دھند چھائے رہنے کا امکان ہے۔ ،محکمہ موسمیات نے اسلام آباد میں ہلکی بارش اور بونداباندی جبکہ دیر، چترال، سوات ،کوہستان ، بالاکوٹ، مانسہرہ، ایبٹ آباد میں پہاڑوں پر برفباری کی پیشنگوئی کی ہے۔ اسی طرح کراچی میں آئندہ 24 گھنٹوں کے دوران موسم خشک اور رات میں خنک رہنے کا امکان ہے۔
