انٹر بینک مارکیٹ میں ڈالر کی قیمت میں بھاری اضافہ، تفصیلات کے مطابق انٹربینک میں کاروباری ہفتے کے پہلے روز کاروبار کے دوران ڈالر کی قیمت میں کمی کے بعد اب اضافہ ہونا شروع ہو گیا ہے۔ آج صبح انٹر بینک مارکیٹ میں کاروبار شروع ہوا تو ڈالر کی قیمت میں 7 پیسے فی ڈالر کی کمی دیکھنے میں آئی البتہ کچھ ہی دیر بعد ڈالر کی قیمت میں اضافہ ہونا شروع ہو گیا اور اب تک ڈالر 68 پیسے مہنگا ہو چکا ہے جس کے بعد انٹر بینک میں ڈالر 281 روپے 25 پیسے پر ٹریڈ ہو رہا ہے۔ خیال رہے کہ 16 اکتوبر سے ا ب تک ڈالر کی قیمت میں 4 روپے 42 پیسے اضافہ ہو چکا ہے، 16اکتوبر کو ڈالر 276 روپے 83 پیسے پر بند ہوا تھا۔
دوسری جانب حکومت کا بجلی مہنگی کرنے کا فیصلہ، بجلی کی قیمت میں 1 روپے 30 پیسے فی یونٹ کا اضافہ کیے جانے کا امکان ہے۔ تفصیلات کے مطابق نگران حکومت نے مہنگائی سے ستائی عوام پر نجلی بم گرانے کا فیصلہ کیا ہے۔ بجلی کمپنیوں نے رواں مالی سال کی پہلی سہ ماہی ایڈجسٹمنٹ کے لیے درخواست نیشنل الیکٹرک پاور ریگولیٹری اتھارٹی میں جمع کرا دی ہے جس میں بجلی کی فی یونٹ قیمت میں 1 روپے 30 پیسے اضافہ کرنے کا کہا گیا ہے۔ درخواست پر سماعت 14 نموبر کو ہو گی۔
بجلی کی قیمتوں میں اضافے سے بجلی صارفین پر 22 ارب 56 کروڑ روپے کا مزید بوجھ پڑے گا۔ نیپرا ذرائع کا کہنا ہے کہ ملک میں بجلی چوری اور لائن لائسز کی مدد میں 6 ارب 61 کروڑ روپے جبکہ بجلی کے استعمال کی مد میں 10 ارب 24 کروڑ روپے وصول کیے جائیں گے۔
